Блаженной памяти архiепископъ Монреальскiй и Восточно-Канадскiй Сергiй (Киндяковъ) читаетъ Слово огласительное во святый и свѣтоносный день преславнаго и спасительнаго Христа Бога нашего воскресенія иже въ святыхъ отца нашего Іоанна, архіепископа Константинопольскаго, Златоустато. Запись на Пасху, 18 апрѣля / 1 мая  2005 года. 

Аще кто благочеcтивъ и боголюбивъ, да насладится сего добраго и свѣтлаго торжества. Аще кто рабъ благоразумный, да внидетъ радуяся въ радость Господа своего. Аще кто потрудися постяся, да воспріиметъ нынѣ динарій. Аще кто отъ перваго часа дѣлалъ есть, да пріиметъ днесь праведный долгъ. Аще кто по третіемъ часѣ пріиде, благодаря да празднуетъ. Аще кто по шестомъ часѣ достиже, ничтоже да сумнится, ибо ничимже отщетѣвается.

Аще кто лишися и девятаго часа, да приступитъ ничтоже сумняся, ничтоже бояся. Аще кто точію достиже и во единодесятый часъ, да не устрашится замедленія: любочестивъ бо сый Владыка, пріемлетъ послѣдняго, якоже и перваго: упокоеваетъ въ единодесятый часъ пришедшаго, якоже дѣлавшаго отъ перваго часа: и послѣдняго милуетъ, и первому угождаетъ, и оному даетъ, и сему дарствуетъ. И дѣла пріемлетъ, и намѣреніе цѣлуетъ, и дѣяніе почитаетъ, и предложеніе хвалитъ. Тѣмже убо внидите вси въ радость Господа своего: и первіи и вторіи, мзду пріимите. Богатіи и убозіи, другъ со другомъ ликуйте. Воздержницы и лѣнивіи, день почтите. Постившіися и непостившіися, возвеселитеся днесь. Трапеза исполнена, насладитеся вси. Телецъ упитанный, никтоже да изыдетъ алчай: вси насладитеся пира вѣры, вси воспріимите богатство благости. Никтоже да рыдаетъ убожества, явися бо общее царство. Никтоже да плачетъ прегрѣшеній, прощеніе бо отъ гроба возсія. Никтоже да убоится смерти, свободи бо насъ Спасова смерть, угаси ю, Иже отъ нея держимый. Плѣни ада, сошедый во адъ! Огорчи его, вкусивша плоти Его. И сіе предпріемый. Исаія возопи: адъ, глаголетъ, огорчися, срѣтъ Тя долѣ. Огорчися, ибо упразднися. Огорчися, ибо поруганъ бысть. Огорчися, ибо умертвися. Огорчися, ибо низложися. Огорчися, ибо связася. Пріятъ тѣло, и Богу приразися. Пріятъ землю, и срѣте небо. Пріятъ, еже видяше, и впаде, во еже не видяше. Гдѣ твое, смерте, жало? Гдѣ твоя, аде, побѣда? Воскресе Христосъ, и ты низверглся еси. Воскресе Христосъ, и падоша демони. Воскресе Христосъ, и радуются ангели. Воскресе Христосъ, и жизнь жительствуетъ. Воскресе Христосъ, и мертвый ни единъ во гробѣ: Христосъ бо воставъ отъ мертвыхъ, начатокъ усопшихъ бысть. Тому слава и держава, во вѣки вѣковъ. Аминь.